علي کريمي

Wikipedia جي

محمدعلي کريمي پاشاکي (بزارۊج ۱۷ آبان ۱۳۵۷) کي علي کريمي نام ٚ أمرأ بشناخته بۊبؤسته، ايراني ٚ سابق فۊتباليست ايسه. علي کريمي گيلک ايسه ؤ ألبۊرز ٚ کرج ٚ مئن دۊنیا بأمؤ ولي اۊن ٚ ايصالت گيلان ٚ لاجؤن-أ واگرده. علي کريمي ۱۸ سال فۊتبال بازي بۊگۊده ؤ ۱۳۷۵ تا ۱۳۹۳ جه، ايران، امارات متحده عربی، قطر و آلمان ليگان ٚ مئن حضۊر بدأشته. علي کريمي خۊ دريبل زئن ؤ حمله ره پۊر مأرۊف ايسه ؤ «جادۊگر» ؤ «آسيا مارادؤنا» جه اۊن ٚ لقبان ايسد. کريمي ۲۰۱۸ سال ٚ مئن، آسيا فۊتبال ٚ کؤنفدراسيؤن ٚ وبجيگا کارگيران ٚ جه ۹۱٪ آراء أمرأ، «تاريخ ٚ بئترين هافبک» ٚ عۊنوان-أ آسيا ميللتان ٚ جام ٚ مئن بيگيته. کريمي ۱۳۹۴ شمسي سال ٚ مئن، ۹۰ تلويزيؤني برنامه مئن مردۊم ٚ ۵۲.۵ درصد رأی ٚ أمرأ ايران ٚ محبۊب‌ترين فۊتباليست ٚ (۱۳۷۰ تا ۱۳۹۴) عۊنوان ٚ ره اينتخاب بۊبؤسته.

کريمي خۊ حرفه‌اي فۊتبال گۊدن-أ ۱۳۷۵ مئن ؤ تئران ٚ فتح ٚ باشگاه جه شرۊع بۊگۊده ؤ دۊ سال ٚ پسي پرسپؤليس ٚ ره بازي بۊگۊده کي اۊیه ۳ فصل بازي پسي اي وار حذفي جام ٚ قهرماني ؤ دۊ وار ايران ٚ فۊتبال ٚ ليگ ٚ قهرماني-أ خۊ تيم ٚ أمرأ بؤبؤرده ؤ ايران ٚ ميللي تيم ٚ أمرأ ني بانکؤک ٚ آسيايي بازي‌ئن ٚ مئن طلا مدال-أ خۊ گردن وارگاده. کريمي ۱۳۷۷ بهمن ٚ مئن داور ٚ دۊسکۊل دأن ٚ وأسي، اي سال ٚ ره فۊتبال گۊدن ٚ جه محرۊم بۊبؤست. بأزين خۊ محرۊميت ٚ تۊمام بؤستن ٚ پسي دۊواره فۊتبال-أ واگردسته ؤ ۲۰۰۰ آسيا ملتان ٚ جام ٚ مئن ني حضۊر بيافته.

کريمي ۱۳۸۰ سال ٚ مئن دؤبی ٚ ألاهلي باشگاه-أ منتقل-أ بؤسته ؤ ۲۰۰۲-۲۰۰۳ فصل ٚ مئن امارات ٚ بئترين خارجي فۊتباليست عۊنوان-أ بيگيته ؤ ۲۰۰۳-۲۰۰۴ فصل ٚ مئن، «امارات ٚ ليگ ٚ گؤل ٚ آقا» ؤ «امارات ٚ فۊتبال ٚ سال ٚ مرداک» ٚ عۊنوانان-أ بيگيته. اۊن ايران ٚ ميللي ٚ تيم ٚ أمرأ، ۲۰۰۴ آسيا ميللتان ٚ جام ٚ مئن سوؤمي مقام-أ کسب بۊگۊده ؤ علاء حبيل ٚ أمرأ کي ايته بحریني فۊتباليست بۊ ايجايي «گؤل ٚ آقا» عۊنوان-أ بؤبؤردئد. اۊن هأ سال ٚ مئن آسيا فۊتبال ٚ سال ٚ مرداک جائزه-یأ آسيا فۊتبال ٚ کؤفدراسيؤن ٚ جه فيگيته. کريمي ۲۰۰۵ سال ٚ مئن بۊشؤ کي بایرن مۊنيخ باشگاه ره آلمان ٚ بۊندسليگا ليگ ٚ مئن بازي بۊکۊنه. اۊن بایرن مۊنيخ باشگاه مئن دۊ سال بمانسته ؤ ۴۲ ته بازي أ باشگاه ره أنجام بدأ کي آلمان ٚ حذفي جام ٚ قهرماني ؤ بۊندسليگا قهرماني-أ أ تيم ٚ أمرأ تجرۊبه بۊگۊده. علي کريمي هأتؤني ۲۰۰۶ جهاني جام ٚ مئن ايران ٚ ميللي تيم ٚ أمرأ حضۊر بيافته ؤ ۲۰۰۷ آسيا ميللتان ٚ جام ٚ مئن ني بازي بۊگۊده. کريمي بأزين بۊشؤ قطر ؤ ألقطر ٚ ورزشي باشگاه ره بازي بۊگۊده. اۊن ايته سال ٚ پسي واگردسته ايران ؤ تئران ٚ پرسپؤليس ٚ باشگاه ملحق بۊبؤسته ؤ ايته سال اۊن ٚ مئن بئسا. کريمي استيل آذين ٚ باشگاه ره ني ۱٫۵ فصل بازي بۊگۊده ؤ ۲۰۱۰-۲۰۱۱ دۊوؤمي نيم‌فصل ٚ مئن، آلمان ٚ بۊندسليگا شالکه تيم ٚ ره بازي بۊگۊده ؤ أ تيم ٚ أمرأ آلمان ٚ حذفي جام ٚ قهرماني-أ جشن بيگيته.

کريمي ۱۳۹۰ سال ٚ مئن سوؤمي وار ره بۊشؤ پرسپؤليس ؤ ۲ فصل بازي پسي تبريز ٚ تراکتؤر ٚ باشگاه ملحق بۊبؤسته ؤ خۊ آخري فۊتبال گۊدن فصل-أ أ تيم ٚ مئن بازي بۊگۊده ؤ اۊ فصل ٚ مئن ايران ٚ حذفي جام قهرماني-أ ني تراکتؤر ٚ أمرأ بؤبؤرده. کريمي ۱۳۹۳ سال مئن کارلؤس کیرؤش ٚ دسیاري أمرأ مۊربيگري حرفه مئن ورۊد بۊگۊده ؤ ايته دؤره رشت ٚ سپيدرۊد ٚ باشگاه سرمۊربي ني بۊ.

کريمي ايته جه فۊتبال ٚ پيله کسان ايسه کي ايران ؤ باخي دۊنيا کيشوران ٚ مئن ايته بشناخته بۊبؤسته فۊتباليست ايسه. اۊن خۊ مخفي خیريه کۊمکان ٚ ره ؤ هأتؤني واکۊنۊشان ؤ مؤضع گيتن ايران ٚ اتفاقان ٚ ره ؤ حيمایت گۊدن ايران ٚ مردۊم ٚ جه، ايته مأرۊف ٚ مدني کۊنۊشگر ني ايسه.[۱][۲][۳][۴][۵]

علي کريمي ايته جه کساني ايسه کي ايران ٚ ۱۴۰۱ اعتراضان ٚ مئن مردۊم ٚ جه حيمایت بۊگۊده ؤ خۊ مجازي حيسابان ٚ مئن پۊر اطلاع ؤ خور رسانئن ٚ ره کۊنۊش بۊگۊده. اۊن گيلان ٚ مردۊم ٚ کۊشتن-أ اعتراضان مئن ني محکۊم بۊگۊده ؤ خۊ اينستاگرام ٚ مئن ايته استؤري بنأ ؤ گيلکي زوان ٚ أمرأ بينیويشته:«گيلک أگر گلۊله جأ ترسئي، هأسأ گيلان ؤ اۊن ٚ مرکز رشت، رۊسيه شين بۊ.»[۶]

سربس[دچينواچين]

  1. {یادکرد وب|عنوان=تمجید ستاره سابق استقلال از کارهای خیریه پنهان علی کریمی|نشانی=http://www.tabnak.ir/fa/news/1057563%7Cوبگاه=تابناک%7Cتاریخ= ۲۳ آذر ۱۴۰۰|بازبینی=2022-09-28}}
  2. {یادکرد وب|عنوان=از «جادوگری» فوتبال تا کنشگری مدنی؛ علی کریمی کجای اعتراضات ایستاده؟|نشانی=https://www.bbc.com/persian/articles/cz9n24jg0z6o%7Cناشر= بی‌بی‌سی فارسی|تاریخ=2022-09-23|بازبینی=2022-09-28}}
  3. {یادکرد وب|عنوان=برخورد با علی کریمی؛ ویلایی که شبانه «پلمب» و «فک پلمب» شد|نشانی=https://www.bbc.com/persian/articles/c727gwkwlvxo%7Cناشر=‌بی‌بی‌سی ارسی|تاریخ=2022-09-27|بازبینی=2022-09-28}}
  4. {یادکرد خبر|عنوان=Iran's Revolutionary Guards seek arrest of 'Asian Maradona' over support for protests|نشانی=https://www.telegraph.co.uk/world-news/2022/09/24/irans-revolutionary-guards-seek-arrest-asian-maradona-support/%7Cکوشش=The Telegraph|تاریخ=2022-09-24|تاریخ بازبینی=2022-09-28|شاپا=0307-1235|زبان=en|نام=Ahmed|نام خانوادگی=Vahdat}}
  5. {یادکرد وب|عنوان=گزارشی درباره کارهای انسان دوستانه علی کریمی / عکس|نشانی=http://khouznews.ir/fa/news/32562/%DA%AF%D8%B2%D8%A7%D8%B1%D8%B4%DB%8C-%D8%AF%D8%B1%D8%A8%D8%A7%D8%B1%D9%87-%DA%A9%D8%A7%D8%B1%D9%87%D8%A7%DB%8C-%D8%A7%D9%86%D8%B3%D8%A7%D9%86-%D8%AF%D9%88%D8%B3%D8%AA%D8%A7%D9%86%D9%87-%D8%B9%D9%84%DB%8C-%DA%A9%D8%B1%DB%8C%D9%85%DB%8C-%D8%B9%DA%A9%D8%B3%7Cناشر=خوزنیوز%7Cبازبینی=2022-09-28}}
  6. https://www.iranintl.com/202210307859