Wikipedia:دؤجئه وانويس/۲۰۲۳/۰۸
مانلي ايته أفسانه‌اي آوزئو مؤجۊد ايسه کي اۊن ٚ سر ؤ بۊجؤر تنه مٚل ٚ انسان-أ مأنه ؤ اۊن ٚ بيجير تنه ماهيان-أ مأنه. مانلي هأتؤ ني به عنوان ايته گيلکي قشنگ ٚ نام کؤران ٚ ره رائج ايسه. مانلي أفسانه‌ئن ؤ داستانان ٚ مئن مأمۊلن أتؤ تؤصيف بۊبؤسته کي دریا ساحل ٚ ورجأ شأ اۊن-أ دئن ؤ اۊن ٚ ايته دس ٚ مئن شانه دره ؤ خۊ مۊ-یه شانه زئندره ؤ اۊن ٚ اۊىته دس ٚ مئن ني آىنه دره. اي سري قصه‌ئن ٚ مئن مانلي آتي تفاقان-أ جه پيش دينه، گاگلف خۊ نيرۊ-یه کي ماورايي ايسه آدمان-أ بخشه ؤ گاگلف ني آدمان تۊغامند به ؤ اۊشان-أ دریا جير بؤره تا اۊشان ٚ أمرأ زيوش بۊکۊنه. مانلي سيرن ٚ أمرأ کي ايته ىۊناني أفسانه‌اي مؤجۊد ايسه پۊر شباهت دأره.
مانليان ويشتر أفسانه‌ئن ٚ مئن ايته مهربان ؤ مثبت ٚ شخصيت ايسده ولي گاگلف نيويشتنکسان خۊشان اي سري داستانان ٚ مئن ني مانلي-أ منفي شخصيت ٚ أمرأ خلق بۊکۊدده کي اۊشان ٚ کادؤ بدىمني آوِرِه، أگر ناراحت ببد دریا مئن طۊفان ايجاد کۊنئده ؤ اۊشان ٚ دئن، خبر جه پاراخۊت ٚ دمردن دنه. اي سري جه مانليان راىن ٚ رۊخان ٚ لؤرلای مأنستن کي ايته آلماني داستاني شخصيت ايسه مالاىان ؤ ملوانان-أ فريفتيدي ؤ اي سري دئه ني اينگيليس ٚ زنؤر ٚ کليسا مانلي مأنستن مردان-أ گۊل زئدي ؤ دریا جير بؤرديد تا اۊشان ٚ أمرأ بزيون.
کۊچي مانلي داستان ٚ دۊرۊن کي هانس کریستین أندرسن ۱۸۳۶ سال ٚ مئن اۊنه بينيويشته أتؤ نقل بۊبؤسته کي مانليان-أ جخترأ شه کي آدمان نتانن اۊشان ٚ مانستن آو ٚ جير تنفس بۊکۊند ولي برخي رواىتان ٚ مئن ني أتؤ گده کي مانلي ايته بخش جه خۊ نيرۊ ؤ توانايي-أ به انسان بخشه تا بتانه خۊ مانستن آو ٚ جير نفس بکشه ؤ اۊن ٚ أمرأ زيوش بۊکۊنه. مانلي أفسانه ويشتر دابان ٚ مئن جه آشۊريان ؤ بابِل ٚ تمدؤن تا دئبار ٚ ىۊنان شأ دئن. اي سري اۊرۊپايي أفسانه‌ئن ٚ مئن مانلي تانه آدمان-أ به اۊشان ٚ ناجه فأرسانه ؤ ژاپؤن ٚ مئن ني مأرۊف ايسه کي مانلي گۊشت تانه باعث جواني ؤ أبدي زيوش ببه....دۊمباله