مدرسهٔ عالي مديريت لاهيجان

گيلانˇ مدرسهٔ عالي مديريت ىا لاجؤنˇ مدرسهٔ عالي مؤديريت ىا اۊجؤر کي نؤمي ايسه مدرسهٔ عالی مدیریت گیلان-لاهیجان (مدرسهٔ عالی مدیریت لاهیجان)، سال ۱۵۴۴ بنابۊبؤ.

دانشگا ماله'ن، شهرˇ مئن

اۊ زمت کي هنۊز گيلانˇ مئن دانشگا ننأ بۊ، لاجؤنˇ مدرسهٔ عالي مديريت ؤ رشتˇ مدرسهٔ عالي بازرگاني، دۊته عالي مدرسه بؤن کي گيلانˇ علم ؤ فرهنگˇ سر پۊر أثر بنأن. وختي سال ۱۵۴۴ (۱۳۴۹ هجري شمسي) لاجؤنˇ مئن اي مدرسه بنابۊبؤ، سيصد ته دانشجۊ (لاکۊ ؤ ريکه) ايرانˇ سراسرأ جي هأىته ؤ اي مدرسه لاجؤن ؤ منطقه مئن هني اۊخؤن دأشت کي شهرˇ مردۊم خۊشؤنˇ خؤنه ىا خؤنه اۊتاقؤنه أننى ارزؤنتر کارىه دأن دانشجۊؤنه ىا حتی اۊ خانواده'ني کي ايشؤنˇ زأکؤن دانشامۊج بؤن، اۊ درسˇ جا کي دانشجۊؤن ايشؤنˇ زأکؤنه دأن، ايشؤنه خۊراک ؤ امکانات هأدأن.

فرهنگ ؤ هۊنر

گيلانˇ مدرسهٔ عالي مديريتˇ دانشجؤن، خئلي خالؤنˇ مئن، تئاتر ؤ عکاسي ؤ فيلمˇ نقد ؤ شعر ؤ مۊزيک ؤ ورزش (فۊتبال ؤ واليبال ؤ کۊشتي ؤ...) ؤ کتاب واتينأدأن (نشر) ؤ مجله بيرين هأدأنˇ مئن کۊنۊش دأشتن. بارانˇ نشريه ىکته نؤمي نشريه بۊ کي چار سال، پرويز صدقياني سردبيريأجي ؤ اۊسته'ن ؤ دانشجؤنˇ همکاريأ جي بيرين أمأ ؤ الؤن اينˇ نۊسخه'ن پىدا نبنه.

تئاتر

سال ۱۵۴۴ زۊمۊسؤن، اي مدرسه مئن أولي تئاتري که دسأچمعي بۊشؤ صحنه سر اجرا بۊبؤ کي "مازيار" نؤم دأشت ؤ صادق هداىتˇ شي بۊ ؤ اکبر ىادگاري اينˇ کارگردان بۊ. سال ۱۵۴۵ "زير گذر لوطي صالح" نماىشنامه بۊشؤ صحنه سر ؤ کم-کمى تئاترˇ مئن دانشجؤنˇ کار جلفأبؤ ؤ خان داىي تئاترˇ جرگه' چاگۊدن. اي جرگه نؤم، دۊ ته نماىشنامه سر دکته مردۊمˇ دأهأن: "شب" (امين فقيهي جي) ؤ "ديکته" (غلامحسين ساعدي جي) ؤ هر دۊ ته کارگردان اکبر مؤمنپۊر بۊ. "ديکته" نماىشنامه ساواکˇ دخالت ؤ اذئته باعث بۊبؤ.

دبستئه بؤن

سال ۱۵۴۹ (۱۳۵۴ هجري شمسي) وختي کي مدرسهٔ عالي مديريتˇ مئن دانشجۊ رۊز ئبه (۱۶ آذر) بؤزؤرگداشت بىتن، حۊکۊمت برزخأبؤ ؤ اي مدرسه' دبسته.

دانشگا گيلانه تنأشؤن

سال ۱۵۵۱ (۱۳۵۶ هجري شمسي) مدرسهٔ عالي مديريت، رشتˇ مدرسهٔ عالي بازرگاني همرأ دۊتئىي گيلانˇ دانشگا همرأ تۊىم بۊبؤن ؤ بۊبؤن گيلانˇ دانشگا. گيلانˇ دانشگا تا سال ۱۵۵۳ چارده ته رشته ؤ ۶۰۵ نفر دانشجۊأ جي خۊ کاره سره دأ.

مدرسه فارغ التحصيلؤن

اي مدرسه درس بۊخؤنده'ن، سال ۱۳۶۲ هجري شمسي، "انجمن فارغ التحصيلان مدرسهٔ عالي مديريت گيلان (لاهيجان)" بنابنأن ؤ اي مدرسه درس بۊخؤنده'نه کي هرته دۊنىا مئن ىک جا ايسأن گردأىته. اي انجۊمن هر سال آبان ماه، لاجؤنˇ مئن گردٚکله گينه خۊ اعضاىˇ مئن ؤ تهرانˇ مئن ني هر ماه نيشت دأنه.