پاچ ٚ باقالا

پاچ ٚ باقالا ایته نؤع باقالا ايسه کي مخصۊص گيلان ايسه ؤ شأ گۊتن کي فقط ايران ٚ مئن دره ؤ باخي کيشوران ٚ مئن به‌شکل عمۊمي ننأ. گيلان تنها اۊستاني ايسه کي اۊن ٚ مئن پاچ ٚ باقالا بکاشته به. ^[۱] پاچ ٚ باقالا، باقالا خۊرۊش ٚ چأگۊدن ٚ وأسي ايستفاده به ؤ أ خۊرۊش ٚ أصلي ماده ايسه. أ محصۊل برداشت ؤ مصرف زماتی أنجام گیره کي اۊن ٚ غلاف ٚ رؤشد خۊ ويشترين حد-أ رسئه. هرته غلاف ٚ مئن معمۊلا ۳ تا ۵ دانه باقالا دره. أ غلاف ٚ رنگ باقالا برسئن ٚ پسي تغيير کۊنه. أ محصۊل گيلان ٚ مئن دۊته پئيز ؤ وهار ٚ فصلان ٚ دۊرۊن کشت به.

خواص

پاچ ٚ باقالا پۊر جه مۊختلف خاصيتان ايسه ؤ اۊن ٚ خۊردن بدن ٚ وأسي مۊفيده. پاچ ٚ باقالا دۊرۊن رۊی ؤ آهن دره ؤ بدن ٚ ايمني سيستم-أ تقويت کۊنه. آنتي اؤکسيداني کي پاچ ٚ باقالا مئن یافت به سرطان ؤ مخصۊصا سينه سرطان ٚ جه جۊلؤگيري کۊنه ؤ أ ناخۊشي بهبۊد ٚ مئن ني پۊر مؤثر ايسه. أ نؤع باقالا خۊ آهن ٚ وأسي، کم خۊني ؤ آهن ٚ فقر-أ درمان کۊنه. پاچ ٚ باقالا ويتامين C ؤ آنتي اؤکسيدان زياد دأره ؤ أشأن پيري مانع ايسد. فيبري کي پاچ باقالا دۊرۊن نهأ بدن ٚ کؤلسترؤل-أ کم کۊنه ؤ أن ديل ٚ ناخۊشي جه جۊلؤگيري کۊنه. هأتؤني ويتامين C ؤ باخي ويتاميناني کي أ باقالا مئن نهأده ديم ؤ بدن ٚ پۊس ٚ وأسي پۊر مۊفيد ايسده.

اصطلاح

پاچ ٚ باقالا ايته عاميانه اصطلاح ني گيلکي زوان ٚ دۊرۊن ايسه ؤ معمۊلا اۊشاني-أ کي کۊتا قد ايسد، شؤخي وأسي پاچ یا پاچ باقالا گۊته به.

سربس

↑ https://www.isna.ir/news/99032616639/%DA%AF%DB%8C%D9%84%D8%A7%D9%86-%D8%AA%D9%86%D9%87%D8%A7-%D8%A7%D8%B3%D8%AA%D8%A7%D9%86-%D8%AA%D9%88%D9%84%DB%8C%D8%AF%DA%A9%D9%86%D9%86%D8%AF%D9%87-%D9%BE%D8%A7%DA%86-%D8%A8%D8%A7%D9%82%D9%84%D8%A7-%DA%A9%D8%B4%D9%88%D8%B1

[1] ttps://www.isna.ir/news/99032616639/%DA%AF%DB%8C%D9%84%D8%A7%D9%86-%D8%AA%D9%86%D9%87%D8%A7-%D8%A7%D8%B3%D8%AA%D8%A7%D9%86-%D8%AA%D9%88%D9%84%DB%8C%D8%AF%DA%A9%D9%86%D9%86%D8%AF%D9%87-%D9%BE%D8%A7%DA%86-%D8%A8%D8%A7%D9%82%D9%84%D8%A7-%DA%A9%D8%B4%D9%88%D8%B1

[۱]