آندري تارکؤفسکي

Wikipedia جي
آندري تارکؤفسکي


آندري آرسينىئويچ تارکؤفسکي (رۊسي مئن: Андре́й Арсе́ньевич Тарко́вский) دۊنئا بۊمأ ۴ آوريلˇ ۱۹۳۲، بمۊرده ۲۹ دسامبرˇ ۱۹۸۶، شؤروي-رۊسي فيلم ساج، نيويشتن-کس، فيلمه ويراىشگر، فيلمه تئؤري پرداز، تياتر ؤ اؤپئرا کارگردان بۊ.

تارکؤفسکي فيلمؤنˇ جي شأنه "ايوانه زأکي" (۱۹۶۲)، "آندري رۊبلي-ئو"(۱۹۶۶)، "سؤلاريس" (۱۹۷۲)، "اىنه" (۱۹۷۵) ؤ "استاکر" (۱۹۷۹)ه نام بۊردن. اۊ اي پنجته جه هفته خۊ فيلمؤنه شؤروي مئن چاکۊده. اينه دۊتته ى آخري جه هفته فيلمؤن که "تاسيان"(۱۹۸۳) ؤ "ايثار"(۱۹۸۶) ايسه'، ايتاليا ؤ سۊئدˇ مئن چاکۊده. ساختارˇ دراماتيکˇ غىر عۊرفي، فيلم برداريه ىکته سيوا عنصر، اثره تأليفˇ واسي در نظر گيتن ؤ رؤحاني ؤ متافيزيکي مؤضۊعاتˇ سر کار گۊدن، تارکؤفسکي مؤشخصه ايسه که هميشک اينه کارؤنˇ مئن دبۊ. اينه کارؤن سينما مئن اۊنقدر اثر بنأ که اۊ کارؤنيه که اينه کارؤنه شبيهنه گۊنن "تارکؤفسکيايي". [۱]

"اينگمار برگمان" تارکؤفسکي جي گۊنه که:

"تارکؤفسکي مئبه ىکته پيله-کس، کارگردانؤنˇ مئن ايسه. کسي که يکته تازه زبان چاکۊده، فيلمه طبيعتˇ امره صادق بۊ ؤ انعکاسي زيندگي جي گيت که خيالˇ مۊرسؤن بۊ."[۲]

مؤهم ترين اثره، تارکؤفسکي سر، "گريگؤري چۊخراى" بنأ که ايته کارگردان بۊ. اۊ که "وي.جي.آى.کئى"ˇ مئن تدريس گۊد خۊ شاگرده استعدادˇ جي تحت تأثير قرار بىته بۊ. چۊخراى تارکؤفسکيه پيشنهاد بدأ که اينه فيلمˇ سر که "کلير اسکاى" نام دأشت، اينه دستىارˇ کارگردان ببي. تارکؤفسکي اول اي پيشنهاد اينئبه خؤش بۊمأ امما بزين تصميم بىته که خۊ آمۊتن ؤ پرؤژه ؤنˇ سر کار بۊکۊني.

آندري تارکؤفسکي تنديس، گئراسيمؤو فيلم ساجي انستيتۊ مئن.

اۊ سۊ سالي که تارکؤفسکي "وي.جي.آي.کئي"ˇ مئن ايسأبۊ "آندره کؤنچالؤسکي" امره آشنا بۊبؤ. اي دۊته بفأمسن که همديگرˇ امره مۊشترک سليقه دأنن ؤ ىکته فيلمˇ جي ايشؤنه خۊش هنه ؤ ايشؤنه خؤجير کارگردان مؤشترک ايسه ؤ همديگرˇ امره سينمايي ايده-ؤنه تبادؤل گۊدن. ۱۹۵۹ˇ مئن ايشؤن "کيشوره قطبˇ جنوبه دۊر"ه وؤته بنويشتن که بأزينؤن "مؤسکؤويسکيج کؤمسؤمؤلئتس"ˇ مئن مۊنتشر بۊبؤ. تارکؤفسکي اۊ وؤته "لئنفيلم"ئبه ني سرأدأ امما رد بۊبؤ. ايشؤنه مۊوفقيت وقتي "جاده صاف کؤن ؤ ويلؤلؤن"ˇ وؤته "مؤسفيلم"ˇ مئن سرأدأن ويشترأبؤ. اي تارکؤفسکي فارئقؤتحصيلي طرح بۊبؤ ؤ ۱۹۶۰ه مئن ديپلؤم هىته ؤ جاىزه اوليه نيؤىؤرکه شاگردؤنˇ فيلمه فستيوالˇ مئن ۱۹۶۱ˇ مئن هىته.

حرفه اي کارؤن:[دچينواچين]

فيلم ساجي شؤروي مئن:[دچينواچين]

تارکؤفسکيه اوولي بساته فيلم "ايوانه زأکي" بۊ که ۱۹۶۲ˇ مئن چاکۊده ببؤ. اي فيلم وقتي اينه سهمي بۊبؤ که ىکته کارگردؤنه ديگر "ائدگارد آبالؤو" نؤمي اي فيلمه خأس بساجي ولي رددأبؤ. اي فيلم تارکؤفسکيه بىنؤالمللي بؤده ؤ اۊ، شير طلاييه ونيزه ۱۹۶۲ˇ مئن ببۊرده. هۊ سالˇ مئن ۳۰ سپتامبرما اينه زأک، "آرسئني" (که تارکؤفسکي خاطراتˇ مئن اۊنه "سنکا" دۊخؤنه) بچئه بۊبؤ.

۱۹۶۵ˇ مئن اۊ "آندرئى رۊبلئوه" کارگرداني بؤده که آندرئى رۊبلئوه زينديگي ايسه که رۊسيه پؤنزه-ۊمي قرنه شي ؤ ايته شماىل نگار بۊ. آندرئى رۊبلئو يکته تک نماىش مؤسکؤ مئن نماىش بدأ بۊبؤ ؤ مۊنتشر بۊؤنˇ پسي شؤروي مسۊلينˇ امره به مؤشکل بؤخؤرده. تارکؤفسکي چندبار فيلمˇ سر، کاره قطع بؤده ؤ در نتيجه اي فيلم چندته ورژنˇ مۊختلف دأنه که ايشؤنه زمات هم فرق کؤنه. ىکته ورژن اي فيلمˇ جي چاکۊده بۊبؤ پسي ۱۹۶۹ "کن"ه فيلم فستيوالˇ مئن نماىش بدأ بۊبؤ ؤ "فيپرئسي" جاىزه' ببۊرده. اي فيلم ۱۹۷۱ سانسۊرˇ پسي، شؤروي مئن پۊر اکران بۊبؤ.

اۊ خۊ زنأکˇ جي "ايرما راش" نؤمي ۱۹۷۰ جۊنˇ مئن سيوا بۊبؤ. اۊ هۊ سالˇ مئن "لاريسا کيزيلؤوا" امره که آندرئى رۊبلئوه دستىارˇ کارگردان بۊ ازدواج بؤده. ايشؤنه پسر "آندرئى آندرئىويچ تارکؤفسکي" هۊ سالˇ مئن، ۷ آگۊست، بچئه بۊبؤ. [۳]

۱۹۷۲ˇ مئن اۊ "سؤلاريس"ه چاکۊده که ايته گرته ويگيري سؤلاريسه رممانˇ جي بۊ که اۊنه "استانيسلاو لئم" بنويشته. اۊ اي فيلمه واسي "فرئدريک گؤرئنشتاىن"ˇ امره که ىکته فيلمنامه نويس بۊ، ۱۹۶۸ˇ پيشترئى، اينˇ سر کار گۊد. اي فيلم "کن"ه فيلمه فستيوالئبه آماده بۊبؤ ؤ هىأت داوري پيلله جاىزه' ؤ فيپرئسي جاىزه' ببۊرده ؤ "پالم د.اؤر"ˇ نامزد ني بۊبؤ. ۱۹۷۳ تا ۱۹۷۴ˇ مئن اۊ "اىنه"' سرأگيته که ىکته پيله شرح حال بۊ که غىر عۊرفي ساختار دأشت. اي فيلم ىکته ترکيب بۊ اينه زأکي جي ؤ اينه پئره شعرؤن. تارکؤفسکي اي فيلمه فيلم نامه سر ۱۹۶۷ˇ جي کار کأدره بۊ ؤ اينه قبلي نامؤن "اقرار"، "سفيد رۊج ؤ ايته سفيدي" ؤ "سفيد رۊج" بؤن. اي فيلمه سرأگيتنه زمات شؤروي مسۊلين منيسن اي فيلمه محتوا که نؤخبه گرا طبيعت دأشته درک بۊکۊنن. شؤروي مسۊلين اي فيلمه سؤوۊم رده مئن طبقه بندي بؤدن که اي فيلمه تؤزيعه محدۊد گۊد به سؤوۊم رده کلاسؤن ؤ فيلم ساجي کارگاه-ؤن. فقط چندته نۊسخه اي فيلمˇ جي چاپ بىته بۊبؤ ؤ هيچ سودي ساتتن کسؤنئبه عاىد نۊبؤ. سؤوۊم رده فيلمؤن ني، اۊ فيلم ساجه، نئنن اۊ دسته مئن که ىعني اۊ فيلم ساج متهم بنه که ملي منابع ؤ ثروته تلف کأدره ؤ اي اۊ کارگردانه بعدي فيلم ساتتنئبه مۊشکيل چاکؤنه. اي دردسرؤن باعث بۊبؤن که تارکؤفسکي به فکر دکأى که شؤروي جي بشي ؤ خۊ فيلمه خارجˇ جي بساجي.

سربس[دچينواچين]

  1. Riffs: 'On Celestial Music,' by Rick Moody، The New York Times.
  2. Title quote of ۲۰۰۳ Tarkovsky Festival Program, Pacific Film Archive
  3. نويشتنکسˇ نؤم: جان جيانويتؤ - وانويسˇ نؤم: آندري تارکؤفسکي: مؤعرفي - سال: ۲۰۰۶ - ناشر: مي‌سي‌سي‌پي دانشگاهˇ انتشارات