کاربر:AminSanaei

امه نودؤنیم چیتؤ خوش بگذرانیم

چند وختی ایسسه کی مو به ای فیکر کأدرم کی چره امه تفریح اینقدر کم ایسسه. چره امره نوأنه که ایبچی همدیگرˇ امره جومأبیم ؤ خوش بوگذرؤنیم. و یا هر وختی گبی خوشگذرانی جی بزه بنه، همه فیکر کؤنن کی الؤن وا ایته ارکستری گورو بأی ؤ پنجا نفر آدم جومأبن ؤ سروصدا بوکونن ؤ برقصن. یا ایکه خیلیئن فیکر کؤنن کی وختی گبی خوشگذرانی جی بنه، ایته پیلله موسافرتˇ یاد ابئنن کی وا هیزار کیلومتر راه بشن ؤ خوشؤنˇ بنزینه تا آخرین چکه بوسجؤنن ؤ سرآخیرم نی ایته خسته جؤن ؤ خالی جوفˇ امره وگردن خؤنه!. مو خأ ای گبه بزنم کی امه هله نودؤنیم چیتؤ وا خوشگذرانی بوکونیم.

هی چن روجˇ پیش بو کی مو ورگرسم ؤ می رفئقه بؤتم "الؤن ایبچی وا تفریح گودن" کی اونم سریع وگرسه بوته "اهأ می دیل دکته بو ایته موسافرت بشم ایصفهان یا مشهد"!، اونه گب جی مو پور توکؤن بوخؤردم ؤ اینه بؤتم می منظور ای نبو کی هیزار کیلومتر راه بشیم بلکی اگر بنایه بر بیرون رفتن ببون، هی گیلانˇ مئن، امی نزدیکی، پور خوجیر جیگاؤنی هننأ کی تا الؤن ندئیم ؤ اگر بینیم اونه هیچ چیزˇ دیگرˇ امره عوضأ نوکؤنیم؛ می رفئق وگرسه مأ ایته نیگا بؤده، بوته آخه ائره ایسأنم تفریح دأنه؟ آدم وا بشی دونیا بینی!.

مو ده ویشتر اینه جی گب نزئم امما می فیکر بوشؤ کی "آخه تو کی تی دیله مئن دره کی غوله شاخه بشکنی ؤ بزین ایرأ اورأ بشی بوگؤی اهأ مو تفریحˇ واسی هیزار کیلومتر تا ایصفهان بوشؤم" سر آخیرم نی ایته بشکسه کمرˇ امره شنی تی اعصاب خوردی دومبال، ای چی لوطفی خو امره دأنه مو نودؤنم. مو اگر بخأم جدی گب بزنم وا بوگؤم کی اینقدر امی دؤر ؤ ور دیدنی جیگا هننأ کی تا آخیره امی عومر فورصت نوکؤنیم جایه دیگره بینم؛ ایجور جاؤن هم امی نزدیکی درن ؤ هم او زیبایی ؤ صفا ایشؤنˇ مئن هننأ. او طرفه جی نی خوشگذرانی ای نیه کی امه حتمن دسکلا ؤ فیشه بزنیم، هی کی امه شنیم ایته خوجیر جیگا ؤ نیشنیم ؤ ای چی خؤنیم ؤ همدیگرˇ امره خوش ؤ بش کؤنیم بئترین خوشگذرانی ایسسه.

شیمی گب