پاسکیاب

پاسکیاب (Paskiyab) ایته جه رشت ٚ قديمي محله‌ئن ايسه کي أ شأر ٚ خۊرخۊس نهأ. پاسکياب کلسيا جه سياسل، نسا جه دانشجۊ پارک، خۊرتاو ٚ جه چۊمارسرا محله ؤ خۊرخۊس ٚ جه عأینک ٚ سل-أ فأرسه.أ أ محله خۊرتاو، ايته قديمي یئخ چأکۊني کارخانه نهأ کي پۊر مأرۊف ايسه ؤ خیلی‌ئن اۊ محله-یأ یئخسازي نام ٚ أمرأ شناسده. قديم ٚ زمات ایته جه أ محله قسمتان دۊرۊن، گيل ٚ مردي کۊشتي گيفته بؤستي کي هأسأ اۊ جيگا مئن أنديشه شأرک-أ چأگۊدئد. پاسکياب ٚ محله اي سري خيابان ؤ کۊچه-یأ؛ کوی طالقانی، کوی حافظ‌آباد (کوی شهید دانش حجتی)، أنديشه شأرک، نۊر ٚ شأرک، ألغدير شأرک، تؤحيد ٚ شأرک، شهید خجسته کۊچه، جانباز کۊچه، زواري کۊچه، پؤتکي کۊچه، زیرپلّه، دانش حجتي مدرسه، أبۊذر ٚ مدرسه، شهید بلال‌زاده مدرسه، حمزه سیدالشهدا مدرسه، پارکسياب ٚ أمیرالمؤمنین مچچد، پاسکياب ٚ صاحب‌الزمان ٚ مچچد، جه پاسکیاب ٚ مۊهم ٚ جيگایان ايسد.

پاسکياب وۊرۊدی مئن قديم ٚ زمات ٚ جه، اي سري گۊر نهأ کي بنظر رسه کي أرمني‌ئن ٚ شینه، ألبت اۊن-أ "جۊهۊدي تپه" ني گۊفتيد.

أ محله کيشاورزي محصۊلات ٚ جه شأ بج، هيندوانه ؤ پاپرۊس-أ ايشاره گۊدن. مردۊم پاپرۊس ٚ برداشت ٚ پسي، اۊشان-أ تا گۊدید ؤ ریسمان جوکودید ؤ کۊرۊج ؤ گرم ٚ خانه مئن وارگاديد. سپس تاچه زهید ؤ بردید تۊتۊن ٚ کارخانه کي ولکس ٚ مئن (عأینک ٚ سل ٚ پسي) نهأبۊ تحویل دهید. رشت ٚ تۊتۊنکاران ٚ ناخۊشخانه-یأ ني هأ کيشاوزان ٚ وأسي چأگۊده بۊد.

پاسکياب ٚ مئن ایته کۊچه ني نهأبۊ کي "أسب کۊچه" نام دأشتي ؤ پاسکیاب-أ أميرالمؤمنين مچچد-أ وصل-أ گۊدی. أزه داران ٚ جنگل یئخسازي کارخانه ورجه، ايته جه زاکان ؤ جوانان ٚ پاتؤقان بۊ کي والیبال ؤ آغوزبازي ؤ چاله گود ٚ أمرأ مشغۊل بۊد.