شیون فومنی دو بیتیان

شیون فومنی دو بیتیان

• کرا مردندرم هیچی ب هیچچی
  • مرا خوردندرم هیچی ب هیچچی
• می امرا صد هیزارتا آرزویا
  • بگیل بردندرم هیچی ب هیچچی

• می دیل از غصه سنگین شب و روز
  • تنور آتشه می سینه از سوز
• نوا خوردن گول می خنده خنده
  • که سالان سال کونه شنبه بنوروز

• حصیر سر خوری افسوس قالی
  • بنازم من تره چی بی خیالی
• بیگیفتید آفتاب چشم زهره
  • هنوزم تو اسیر خط و خالی

• جه دوزد هر چی مانه رمال شینه
  • که خرس ارثیه کفتار شینه
• ایسه تا زرد سگ تی خانه بر پا
  • تی مرغ لانه دربست شال شینه

• هنوز تو جاهلی تی ذوق نمرده
  • تره خواب مین آبی نبرده
• نچشتی گرم و سرد روزگاره
  • تی زخم سر هنوز بادی نخورده

• بشومی جورجوران جایی نیافتیم
  • بمومی جیرجیران راهی نیافتیم
• بگردستیم تمام ا زمینا
  • امی هویه آخر هایی نیافتیم

• اگر زرده می دیم از بی نوایی
  • اگر ساختندرم بی روشنایی
• ولی آویزیه می گوش ا گب
  • گدا کیسه پره از روسیایی

• می پای گیل واجه تی دس تمیزه
  • می دیل ناجه داره تی نیزه تیزه
• می زای گرده بیجاره پابرانده
  • تی زای جدول نویس پشت میزه

• خرم رایا نوا نان بد نوا شون
  • تی کاران بیدین سر خود نوا شون
• بمیرم ضامن آهو ره اما
  • دس قرض مره مشهد نوا شون

• وره برف کوه و دشته خسته خسته
  • درخت شاخه زنگوله دوسته
• تی پا پرکه چره می دیل نبه خون
  • وبال گردنه دست شکسته

• دهم سیلی مرا سورخی می دیمه
  • کشم خورشید خوشحالی نسیما
• نانم کویتا فرشته روز خلقت
  • ببافته پاره می بخته گلیما

• خوره چمچه می شین تای تیانه
  • که لابدان تار بزه می سفره نانه
• بگو می کول دیمه خاطر تی شین جم
  • که دوزد دزدی نشه مهتاب شبانه

• اما پورد دانه تخته بتاشتیم
  • ریز ریحان شیمی راسر بکاشتیم
• اما که دریا دامن پیللا بستیم
  • ایته ماهی سفیدا ناجه دیشتیم

• نیه هیچکی می حال زاره در بند
  • کرا د اورسفه می نازک بند
• بینیش می ور تره تامن بنالم
  • که آدم ب گبه ، حیوان بلافند

شیون فومنی شعران

گیلان اوی گیلان، آچه مچی، شیون فومنی دو بیتیان.