شميران قلا

شميران قلا

شميران قلا ايتا موهمˇ قلا ايرانˇ مئن ايسه كه محلي مردومان اونه شميران و سميران دوخانيد و تاريخي نويشته‌هانˇ مئن سميران، شميران ، سميرم، شمع ايران، كنگريان، سميويروم و سالاريه بنيويشته بوسته. اَ قلا جاجيگاه، بهرام آبادˇ دیهاتˇ ورجا، جه طارمˇ توابع ايسه.

چاگوده بوستن

مألوم نيه شميرانˇ قلايه كي چاگوده، تارمˇ مئن اولي كسي كه حكومت گودي شميران قلا مئن كه سالاري قلا هم دوخاديد ، محمد بن مسافر (گيلكي: ممد، مسافر ريك) بو. محمد بن مسافر، كنگريان خانواده اولي شاه ايسه، كه اونه نامَ، تاريخي كيتابان مئن بنيويشتيد.

سرگوذشت

ابودلف مسعر بن مهلهل (گيلكي: مسعر مهلهل ريك)، موسلمان جوغرافي دان بو كه سال 331 هجري مئن اَ قلايه بيده، شميران قلا محمد بن مسافر پايتخت و ديلم چَكنه دوخانه. ابن حوقل 376 ه.ق مئن، ناصر خسرو 438 ه.ق مئن، ياقوت حموي 623 ه.ق مئن، قزويني 674 ه.ق، حمداله مستوفي 740 ه.ق و سِد ظهيرالدين مرعشي 880 ه.ق مئن اونه جاجيگاه بيدِئيد و مطلبي بنيويشتيد

شادروان احمد كسروي بنيويشته: خيلي زمات بو كه كنگريان، ديلمان مئن قودرتي نَشتيد تا او وختيكه بِتَنَستيد شميران قلايه كه پيدا نبو كي واسي بو، تصرف بوگوديد و كومك اَ ديز اَمره كل تارم كه قزوين شين بوستي بدست باوريد. و جَستان امره ديلم شاه خويشي بوگوديد و اوشانه قودرتَ هر روز ويشترَ بوسته و خوشانه پادشاهي وجود باورديد. ابن اثير حوادث سال 454 هجري مئن بنيويشته: اَ سال مئن، سولطان طغرل بيگ بوشو ديلم سرزمين، و تارم قلا مئن و مسافر ديلم شاه جه صد هزار دينار و هيزار جامه بخواسته.

با همه بلاياني كه شميران قلا سر، تارم مئن دَكفته، اَ قلا سال 921 هجري برپا بو اونه نام تاريخ خاني بامو. ولي بازون معتبر تاريخي بِنيشتيه هان مئن نامي ازون نيه. تا قرن نوزدهم ميلادي ايراني و خارجي سياحان اونه ايتا فوگوردسته قلا دوخاديد.

قلا ويژگي

ناصر خسرو بنيويشته كه اَ قلا سه تا چَپَر داشتي ولي هَسه، دوتا اونه چَپَران شناخته بوبوسته. سالمِ بخش اَ قلا، اونه شومالي ديوار ايسه كه چند تا سالمه چپر و قاقل تره بِمانَسته. بولندي اَ ديوار 15 متر و لاشه سنگ و ملات امره كه اونه پهنا 40/2 متر ايسه چاگوده بوسته.

شميران قلا ايتا جه قديمي قلاين ايران مئن ايسه. بدبختانه هَسه، اَ قلا خيلي بورسفته ايسه و ازون چيزي سالم نمانَسته و وضع اَ قلا يه، همه كسَ جخطره شو و كسي به فكر اون نيه. ايتا روز بو كه اَ قلا خوره شكوهي داشتي و پيله كساني اونه مئن حكومت بوگيديد.